• २०७७ असोज १० गते शनिवार
  • Preeti To Unicode

विमान दुर्घटनामा ३६ जनाको मृत्यु भएको पुष्टि, विमानमा ३३ यात्रु नेपाली थिए


फागुन २८, काठमाडौं।

यूएस एयरको विमान दुर्घटनामा ३६ जनाको मृत्यु भएको पुष्टि भएको छ । ढाकाबाट काठमाडौं आएको विमान त्रिभुवन अन्तराष्ट्रिय विमानस्थलमा दुर्घटना भएको थियो । दुर्घटना स्थलमा २८ जनाको शव संकलन गरिएको छ ।

३१ जनाको उद्दार गरिएकोमा ८ जनाको मृत्यु भएको एसएसपी पूर्णचन्द्र जोशीले जानकारी दिए । मृतकको संख्या बढ्नसक्छ । घाइतेहरुको केएमसी, नर्भिक लगायतका अस्पतालमा उपचार भइरहेको छ ।
विमान दुर्घटनाबारे जानकारी लिन प्रधानमन्त्री केपी शर्मा ओली विमानस्थल पुगेका छन् । उद्दार प्रयासबारे जानकारी दिन प्रधानमन्त्री ओली पनि पुगेका हुन् ।

विमानमा ३३ नेपाली थिए, २ बजेर १८ बजे दुर्घटना
यु.एस.–बङ्ग्ला एअरलाइन्सको बम्बार्डिएर ड्यास ८ बिमान सोमबार २ बजेर २० मिनेटमा त्रिभुवन अन्तराष्ट्रिय विमानस्थलको धावनमार्गमा चिप्लिएर दुर्घटनाग्रस्त भएको छ ।

यु.एस.–बङ्ला एअरलाइन्स बङ्लादेशको सात विमानसेवा मध्य एक हो । यो बङ्लादेशको नीजि विमान सेवा हो । यसलाई यु.एस.–बङ्ला ग्रुपले सञ्चालन गरिरहेको छ । सन् २०१० मा स्थापना भएको यो वायुसेवाले सन् २०१४ बाट सेवा शुरु गरेको थियो । शुरुका केही वर्ष आन्तरिक उडान मात्र भरिरहेको यो वायुसेवाले सन् २०१६ बाट अन्तराष्ट्रिय सेवा दिन थालेको हो ।

हाल यो विमानसेवाले आन्तरिक उडानको अतिरिक्त भारत, नेपाल, मलेशिया, ओमन, कतार , सिङ्गापुर र थाइल्याण्ड सात देशमा अन्तराष्ट्रिय सेवा दिइरहेको छ । यसका लागि विमानसेवाले १५८ क्षेमताका बोइङ्ग ७३७ का ४ वटा र बम्बार्डियर ड्यास–८का ४ विमान प्रयोग गरिरहेको छ ।

आज दुर्घटना भएको मोडल बर्मबार्डिएर ड्यास–८ विमान दुई इन्जिन भएको, मध्यम दुरीमा उडान भर्न मिल्ने खालको विमान हो । यो विमानलाई ‘डि ह्याभिल्याण्ड क्यानडा’ले सन् १९८४ मा सार्बजनिक गरिएको थियो । सो समय यसलाई उत्पादक कम्पनीको नाम जोडेर ‘डि ह्याभिल्याण्ड क्यानडा ड्यास–८’ भनिन्थ्यो । हाल यसलाई ‘बमबार्डिएर एरोस्पेस’ले उत्पादन गर्ने भएकाले यसको नाममा सोही कम्पनीको नाम जोडिएको छ ।

यो विमानहरुको संस्करण जनाउन कम्पनीले ‘क्यु सेरिज’ नाम दिने गरेको छ । नेपालमा दुर्घटना भएको विमान क्यु–४०० हो । क्यु–४०० बम्बार्डिएर एरोस्पेसले उत्पादन गरेको सबैभन्दा पछिल्लो संस्करणको विमान हो । कम्पनीले आफ्ना पुराना विमान श्रृङ्खलाहरु सन् २००९ बाट उत्पादन गर्न बन्द गरेकाले हाल कम्पनीले यही क्यु–४०० मात्र उत्पादन गरिरहेको छ ।

यो अघि पनि सन् २०१५ सेप्टेम्बर ४ मा यु.एस.–बङ्लाको ‘बम्बार्डिएर ड्यास– ८ क्यु–४०२एस’ विमान आन्तरिक उडानको क्रममा धावनमार्गबाट चिप्लिएको थियो । सो दुर्घटनामा भने कुनै हताहती भएको थिएन ।

प्रधानमन्त्री ओली विमानस्थलमा

दुर्घटना भएपछिको अबस्थाबारे बुझ्न प्रधानमन्त्री केपी शर्मा ओली त्रिभुवन विमानस्थल पुगेका छन् ।
गृहमन्त्री रामबहादुर थापा सहित उच्च सरकारी अधिकारी विमानस्थलमा पुगेका छन् । नेपालका लागि बंगलादेशका राजदूत पनि विमानस्थलमा पुगेका छन् ।

घटनाको सम्बन्धमा विमानस्थलमा पत्रकार सम्मेलनको आयोजन ागर्ने तयारी भइरहेको त्यहाबाट लोकान्तर सहकर्मी प्रशान्त ओझा र इश्वर अर्यालले जनाएका छन् ।

६७ यात्रु र चालक दलका ४ सदस्य सहितको बिमान सोमवार बिमानस्थलमा दुर्घटनामा परेको थियो ।

 

प्रकाशित मिति : २०७४ फाल्गुन २८ गते सोमवार