• २०७९ मङ्सिर १८ गते आइतवार
  • Preeti To Unicode

सल्यानका काफल दाङमा बेचेर घरखर्च जोहो गर्दै महिलाहरु !


जेठ ३१, दाङ । सल्यानको काफलले दाङमा राम्रो बजार पाएको छ । आफ्नो घरखर्च जोहो गर्न न्यून आयस्रोत भएका परिवारका महिलाहरुले दाङका विभिन्न ठाउँमा सल्यानबाट ल्याएको काफल बिक्री गर्ने गरेको समाचार राससले लेखेको छ ।

विपन्न परिवारका महिलाका लागि यस याममा पाक्ने काफल आम्दानीको राम्रो स्रोत बनेको छ । मौसम अनुसारका फलफूलको व्यापार गरेर आम्दानी गर्दै आएका महिलाले अहिले काफलबाट राम्रो आम्दानी गरिरहेका छन् ।

दाङका सदरमुकाम र राजमार्ग आसपास क्षेत्रमा मौसम अनुसारका फलफूल तथा जङ्गली फल काफल बेच्नेको ताति नै लाग्ने गरेको छ ।

दाङका विभिन्न बजारमा काफल बेचेर उनीहरुले दैनिक रु चार हजारसम्म आम्दानी गर्ने गरेका छन् । सल्यान कपुरकोटबाट ल्याएका काफल बेचेर मात्रै दैनिक चार हजारसम्म आम्दानी गर्ने गरेको तुलसीपुर बजारमा काफल बेच्दै आएकी धनसरी घर्तीले बताउँछिन् । ‘दिनमा चार हजारसम्म कमाइ हुन्छ’, उनले भने, ‘कहिलेकहीँ त त्योभन्दा बढी पनि हुन्छ ।’

दिनभरि काफल टिपेर भोलिपल्ट बिहानै तुलसीपुर बजारमा काफल बच्ने गरेको तुलसरा विकले बताए । ‘बुढा कामको सिलसिलामा काभ्रे पलाञ्चोक बस्नुहुन्छ, यहाँ मैले काफल बेचेर घरखर्च चलाउँछुु, उनले भने, ‘बुढाको कमाई सबै बचत गरेको छु ।’

त्यस्तै बिहानै कपुरकोटबाट तुलसीपुरमा काफल बेच्न आउने गरेकी शिवा पुनले पनि काफल हुने मौसममा राम्रो आम्दानी गर्ने गरेको बताइन् । एक महिनामा १५ दिन काफल टिप्न जाने र १५ दिन काफल बेच्ने गरेको उनको भनाइ छ ।

अहिले बजारमा एक मानोको ३० मा बेच्ने गरिएको उनले बताइन् । ‘पोहोरसाल रु २५ मा बेच्ने गरेका थियौँ’, उनले भनिन्, ‘अहिले ३० मा हामीले काफल बेच्ने गरेका छौँ ।’

त्यस्तै तुलसीपुरकी तारा नेपालीले पनि काफलबाटै घरपरिवार पाल्दै आएकी छन् । अरुले टिपेको काफललाई खरिद गरेर बेच्दै आएकी छन् । उनले आफैँ टिप्न नसक्ने भएकाले अरुले ल्याएको काफल खरिद गरेर बेच्ने गरेको बताइन् । ‘आफैंले टिपेर ल्याएर अलि बढी आम्दानी त गर्न सकिन्छ, तर अरुले ल्याएको काफललाई खरिद गरेर बिक्री गर्दा पनि राम्रै हुन्छ’, उनले भनिन्, ‘त्यसो गर्दा पनि दैनिक रु ५०० सम्म आम्दानी हुने गरेको छ ।’

यो समयमा यहाँका महिलाले काफल बेचेरै आफ्नो दैनिकी चलाउने गरेका छन् । अहिले दाङका बजारमा काफल बेच्ने महिला धेरै छन् । तुलसीपुर बजारमा कपुरकोटबाट, घोराहीलगायत आसपासका बजारमा रोल्पाबाट तथा लमही, भालुबाङ बजारमा प्यूठानबाट काफल आउने गरेको छ ।

गर्मी समयमा बजारमा काफलको माग अत्यधिक हुने गरेको छ । अन्य समयमा अरु नै पेशा गर्ने गरेको भए पनि महिलाले काफल पाक्ने मौसममा भने काफलकै व्यवसाय गर्ने गरेको बताउँछन् ।

प्रकाशित मिति : २०७६ जेष्ठ ३१ गते शुक्रवार