• २०७८ असोज ८ गते शुक्रवार
  • Preeti To Unicode

विदेशीहरु पनि वर्किङ भिसामा नेपाल आउँछन्


भाद्र ९, काठमाडौं । नेपालीहरू काम गर्न तथा अध्ययनका लागि बिदेसिने क्रम बढिरहेको बेला विदेशबाट नेपालमा काम गर्न तथा पढ्नकै लागि विदेशीहरू आउने गरेको पाइएको छ । अध्यागमन विभागका अनुसार सन् २०१८ मा विभिन्न मुलुकबाट २ हजार २ सय ८८ जना विदेशी नागरिक वर्किङ भिसामा नेपाल आएका छन् ।

यस्तै, सन् २०१९ को अगस्टसम्ममा विभिन्न देशका १ हजार ३ सय ८४ जना विदेशीले नेपालमा काम गर्न भिसा अनुमति प्राप्त गरेका छन् । विभागका अध्यागमन अधिकृत राजेश महर्जनले सन् २०१८ र २०१९ को अगस्टसम्म ३ हजार ६ सय ७२ जना विदेशी नागरिकले वर्किङ भिसा अनुमति प्राप्त गरेको जानकारी दिए । आजको राजधानी दैनिकमा समाचार छापिएको छ,

नेपालमा विभिन्न किसिमका ठूला योजना, सडक तथा पूर्वाधार निर्माणमा काम गर्न विदेशी निर्माण कम्पनीहरूले कामदार ल्याउने गरेका छन् । यसरी ल्याइएका कामदारलाई निर्माण अवधिभर कम्पनीहरूले नै राख्ने गरेका छन् ।

नेपालमा वर्किङ भिसामा चीन, जापान, कोरिया, फिलिपिन्स, थाइल्यान्ड, भुटान, बंगलादेशलगायतका मुलुकबाट विदेशी नागरिक आउने गरेका छन् । अन्य भिसामा प्रवेश आज्ञा लिएर काम गर्ने विदेशीका हकमा भने अध्यागमन विभागले कडाइ गर्ने गरेको छ ।

अध्यागमन विभागका निर्देशक रामचन्द्र तिवारीले वर्किङ भिसाबाहेक अन्य भिसामा आएकाले भने काम गरेको पाइए अध्यागमनले कारबाही गर्ने बताए ।  ‘प्रवेश स्वीकृति पाएको बाहेकका विषयमा कुनै पनि गतिविधि गर्न पाइँदैन,’ निर्देशक तिवारीले राजधानीसँग भने, ‘विपरीत भएको पाइए कारबाही गरिन्छ ।’

विदेशी नागरिकले नेपालमा काम गर्न आउँदा भने विभिन्न प्रक्रिया पूरा गरेपछि मात्रै भिसा अनुमति पाउँछन् । वर्किङ भिसामा आउने विदेशी नागरिकका विषयमा कामदार ल्याउने कम्पनीले नै उनीहरूको अनुमति प्रक्रिया सुरु गर्नुपर्छ । यस्तै, काम गर्ने ठाउँबाट समेत सम्बन्धित मन्त्रालयलाई पत्र पठाउनुपर्छ भने कामदारको श्रम स्वीकृतिसमेत भएको हुनुपर्छ ।

सबै प्रक्रिया पूरा भएपछि गृह मन्त्रालयबाट कार्य स्वीकृति पाएपछि मात्रै सम्बन्धित मन्त्रालयले अध्यागमनलाई पत्र पठाएपछि विदेशी नागरिकले नेपालमा काम गर्न अनुमतिसहित प्रवेश आज्ञा पाउनेछन् ।

यसैगरी, सन् २०१८ मा २ हजार २ सय ८२ जना विदेशी नेपालमा अध्ययनका लागि भिसा अनुमति पाएका छन् भने २०१९ को अगस्टसम्म ९ सय २९ जना विदेशीले नेपाल आएर विभिन्न विषय पढ्न भिसा अनुमति पाएका छन् ।

यसरी अध्ययनका लागि नेपाल आउने विदेशीहरूमा श्रीलंका, पाकिस्तान, माल्दिभ्स, बंगलादेश, भुटान, चीनसहितका देशका नागरिक छन् । यसरी विभिन्न मुलुकबाट आउने विदेशीले नेपाली, नेवारी, बौद्ध दर्शन, संस्कृतलगायतका भाषाको अध्ययन गर्न सम्बन्धित निकायबाट अनुमति प्राप्त गरेर भिसाको प्रक्रियामा जाने गरेका छन् ।

प्रकाशित मिति : २०७६ भाद्र १० गते मङ्गलवार