• २०७८ असोज ७ गते बिहिवार
  • Preeti To Unicode

काबुलमा भएको आत्मघाती हमलामा २ नेपालीसहित १६ जनाको मृ’त्यु, सयौं घाइते


भाद्र १८, काठमाडौँ । अफगानिस्तानको राजधानी काबुलस्थित ग्रीन भिलेज क्याम्पमा सोमबार राति पौने १० बजे भएको बम बिस्फोटमा परी २ जना नेपालीसहित कम्तीमा १६ जनाको ज्यान गएको छ । एक सय १९ जना घाइते छन् । आजको कान्तिपुरमा समाचार छापिएको छ,

पाकिस्तानको इस्लामावादस्थित नेपाली दूतावास स्रोतले समेत आत्मघाती हमलामा २ नेपालीको मृ’त्यु भएको अनौपचारिक जानकारी आएको बताएको छ। केही समय यता अफगानिस्तान समेत दिल्ली दूतावासले हेर्ने गरेको छ। मृ’त्यु भएका दुवै नेपाली ग्रीन भिलेज क्याम्पको सुरक्षाको जिम्मा पाएको ‘गार्दा वर्ल्ड’ नामक क्यानेडियन सुरक्षा कम्पनीमा कार्यरत थिए।

घाइतेमा कोही पनि नेपाली नरहेको स्रोतले जनाएको छ। सोही स्थानमा लामो समय काम गरेर करिब पाँच महिनाअघि फर्किएका एक नेपालीका अनुसार त्यति बेला त्यहाँ करिब ११८ जना नेपाली र केही नेपालीभाषी भारतीय नागरिक सुरक्षा गार्डका रुपमा तैनाथ थिए।

‘बिस्फोटमा परी १२ जना अफगानी र २ जना अर्को देशका सुरक्षा गार्डको पनि ज्यान गएको जानकारी छ,’ उनले भने। उनले पाएको सूचनाअनुसार बाहिरी पोस्टमा बिस्फोट गरेर ४/५ जना तालिबानी आतंकवादी क्याम्प भित्र प्रवेश गरी अन्धाधुन्द गोलीबारी गरेका थिए। मृत्यु हुनेमा अधिकांश क्याम्प नजिकैको वस्तीका बासिन्दा छन्।’

बिस्फोटका लागि ट्रक नै प्रयोग गरिएको त्यहाँ कार्यरत नेपाली साथीहरुले आफूलाई जानकारी दिएको उनले बताए। स्रोतका अनुसार बिस्फोटमा परी चितवन घर भएका कृष्ण थापा र रोल्पा घर भएका चन्द्र पुनको मृ’त्यु भएको हो। उनका अनुसार गार्दा वर्ल्ड तथा दिल्लीस्थित नेपाली दूतावास कुनैले पनि मृ’त’कको परिवारलाई औपचारिक जानकारी गराएका छैनन्। थापा र पुन दुवैको घटनास्थलमा नै मृ’त्यु भएको हो।

‘कृष्ण थापा तैनाथ रहेकै पोष्ट नजिक बिस्फोट भएपछि उनको तत्कालै मृ’त्यु भएछ,’ स्रोतले भन्यो, ‘चन्द्र पुन भने अफ ड्युटीमा रहेछन्। बिस्फोटपछि कभर दिन जाँदा आतंकवादीको गोली लागेछ।’

ग्रीन भिलेज क्याम्प विदेशीहरू बस्ने भवन परिसर हो। काबुलबाट जलालावाद जाने राजमार्गको किनारमै रहेको क्याम्प जाने बाटोको दाँयातर्फ भने स्थानीय वस्ती छ। क्याम्पमा भएको आत्मघाती बिस्फोटपछि त्यहाँ रहेका ४ सय जना विदेशीलाई अर्को सुरक्षित स्थानमा सारिएको थियो।

आत्मघाती हमलाको जिम्मा तालिवान समूहले लिएको छ। उसले विदेशी सैनिकलाई लक्षित गरी आक्रमण गरेको दाबी गरेको छ। तालिवानले उक्त भवनमा सशस्त्र लडाकुहरू रहेको दाबी गरेको रोयटर्सले उल्लेख गरेको छ। ग्रीन पार्कमा भएको यो पाँचौं ठूलो हमला हो। २०७३ असार ६ गते काबुलमै नेपाली सुरक्षा गार्ड सवार मिनिबसमा बम बिस्फोट हुँदा १४ नेपालीको मृ’त्यु भएको थियो।

प्रकाशित मिति : २०७६ भाद्र १८ गते बुधवार