• २०७८ कार्तिक ११ गते बिहिवार
  • Preeti To Unicode

सरकारको कार्यशैलीले देश गम्भीर खतरामा फस्ने भन्दै जिम्मेवार बन्न सुझाव


मंसिर ७, नवलपुर । जनपत्रकार संगठन नेपाल लुम्बिनीद्वारा शनिबार नवलपुरको कावासोतिमा आयोजित मानवअधिकार, प्रेस तथा अभिव्यक्ती स्वतन्त्रता एवम् वर्तमान राजनीतिक अवस्था र राष्ट्रियता बिषयक अन्तरक्रिया कार्यक्रममा बोल्ने वक्ताहरूले सरकारको कार्यशैलीले देश गम्भीर खतरामा फस्ने भन्दै जिम्मेवार बन्न सरकारलाई सुझाव दिएका छन् ।

कार्यक्रममा सहभागी वक्ताहरूले बढ्दो राजनीतिक जटिलता र जनआक्रोसलाई बेलैमा गम्भीरतापूर्वक नलिए देश नयाँ अवस्थामा प्रवेश गर्ने चेतावनी दिएका हुन । जनपत्रकार संगठन नेपालले आयोजना गरेको कार्यक्रमलाई पटकपटक प्रमुख जिल्ला अधिकारीले कार्यक्रम रोक्न भन्दै चेतावनी दिईरहेका बेला वक्ताहरूले शान्तिपूर्ण रुपमा कार्यक्रम गर्दा समेत रोक्न निर्देशन दिने प्रशाशक प्रति असन्तुष्टि पोखेका थिए ।

कार्यक्रम हुनु पुर्व प्रशासनले कार्यक्रम रोक्न भन्दै विभिन्न माध्यमबाट चेतावनी दिएको थियो । कार्यक्रम शान्तिपूर्ण ढंगले आयोजना गर्दागर्दै हस्तक्षेप गरेपनि जसरी पनि कार्यक्रम गर्ने अडान संगठनले लिएपछि कार्यक्रम सुरु भएको थियो । कार्यक्रममा जताततै व्यापक प्रहरी परिचालन गरिएको र कार्यक्रम स्थगित गर्न भन्दै प्रशासनले ताकेता गरिरहेको थियो ।

कार्यक्रममा बोल्दै नेपाल कम्युनिस्ट पार्टीका अध्यक्ष ऋषि कट्टेलले राजनीति विचार संग असहमति राख्दैमा कुनै शक्तिलाई प्रतिबन्ध लगाउने सरकारी कदमको भ्रत्सना गरेका थिए । अन्तरक्रिया कार्यक्रममा बोल्दै अध्यक्ष कट्टेलले पछिल्लो समय नेपालमा मानवअधिकार र प्रेस स्वतन्त्रताको देखाउने दात मात्रै भएको टिप्पणी गरेको जिकिर गरे ।

उनले मानवअधिकारको अवस्था कमजोर बन्दै गएको टिप्पणी गर्दै प्रतिकुल परिस्थितिलाई सरकारले गम्भीरता पुर्वक नलिने हो भने देशमा द्वन्दमा जाने तर्क गरे । नेता कट्टेलले प्रश्न गरे, ‘एउटा कम्युनिस्ट पार्टीको सरकारमा छ । अर्को कम्युनिस्ट पार्टीलाई प्रतिबन्ध लगाईएको छ । यो कस्तो कम्युनिस्ट शासन हो ?’

फरक प्रसंगमा कट्टेलले माओबादी जनयुद्ध र झापा विद्रोहबाट आएका शक्तिहरुले खुला राजनीतिक गतिविधि समेत गर्न नदिनुले निरङ्कुसताको संकेत गरेको बताए । जनयुद्धकालमा जस्तो अहिले कम्युनिस्ट सरकारले र एउटा राजनीति दलका कार्यकर्तालाई  भिडन्तका नाममा हत्या गर्नु यो कस्तो लोकतन्त्र हो भन्दै उनले आक्रोस पोखे । विकास र समृद्धिको बहस चलाउने सरकार भष्ट्रचार र अनियमितता बारे मौन रहेको उनको जिकिर थियो ।

कार्यक्रममा जनपत्रकार संगठन नेपालका केन्द्रीय अध्यक्ष प्रकाश डुम्रेले प्रेस स्वतन्त्रता संकटमा फस्दै गएको भन्दै मिडिया जगत गम्भीर बन्नुपर्ने बताए । अध्यक्ष डुम्रेले शान्तिपूर्ण कार्यक्रम रोक्न प्रशासनले गरेको ज्यादतीको कडा शब्दमा आक्रोश पोखेका थिए ।

डुम्रेले प्रेस तथा अभिव्यक्ति स्वतन्त्रता पक्षमा बहस चलाउदा राज्यले गिरफ्तार गरे गिरफ्तारी दिन तयार रहेको बताए । कार्यक्रममा राष्ट्रिय जनमोर्चाका जिल्ला अध्यक्ष दिपक पाण्डेले  मानवअधिकार र अभिव्यक्ति स्वतन्त्रताको बिषयमा सरकार गम्भीर बन्नुपर्ने बताए । उनलेे नक्कली कम्युनिस्टको शैली हेर्दा उदेकलाग्दो भएको भन्दै व्यंग्य गरेका थिए ।

त्यस्तै नेकपा क्रान्तिकारी माओबादीका नेता उतम थापाले सरकारले न्युनतम कम्युनिस्ट आचरण भुलेको भन्दै सरकारी रबैयाले पञ्चायतकालको झल्को दिएको टिप्पणी गरे ।

कार्यक्रममा नेपाल बार एसोसिएका प्रतिनिधि तेज प्रसाद शर्मा, नेपाल पत्रकार महासंघका प्रदेश कोषाध्यक्ष दिपक भट्टराई, नागरिक अगुवा डाक्टर माया गिरी, नेपाल पत्रकार महासंघका उपाध्यक्ष श्रीराम सिग्देल, प्रेस युनियनका सचिव खगराज सापकोटा, फोनिजका प्रदेश उपाध्यक्ष कमला थापा,  नेकपा नेता केदार पराजुली, ईन्सेक प्रतिनिधि तिर्थ डुम्रे, मानवअधिकारकर्मि  रमेश शर्मा लगायले बोलेका थिए ।

संगठनका  केन्द्रीय सदस्य शिव डुम्रेको अध्यक्षता भएकाे कार्यक्रमकाे संचालन अनिल नेपालीले गरेका थिए । पछिल्लो समय मानवअधिकार र प्रेस स्वतन्त्रता कमजोर बन्दै गएको निष्कर्ष सहित जनपत्रकार संगठनले देशभर अभियान चलाएको थियो ।

राजनीतिक विचार र आस्थाका कारण नागरिक एवम् पत्रकारहरु धरपकड र गिरफ्तार बढ्दै गईरहेको बेला पत्रकार संगठनले सरोकारवाला विच अन्तरक्रिया कार्यक्रम आयोजना गरेको हो । संगठनले यस अगाडि मेची देखि महाकाली सम्म ४० जिल्लामा उक्त कार्यक्रम सञ्चालन गरेको संगठनले जनाएको  छ ।

प्रकाशित मिति : २०७६ मङ्सिर ७ गते शनिवार