दाङ। संघीय गणतन्त्र नेपालको संविधान जारी भइ आठौं बर्षमा प्रवेश गरेको अवसरमा आज देशैभरी उल्लासका साथ संविधान दिवस मनाएको छ । नेपाली काङ्ग्रेस घोराही नगर समितिले घोराही उपमहानगरपालिका -१४ लखन पर्कमा दीप प्रज्वलन तथा नेपालको झण्डा अनावरण गरि संविधान दिवस मनाएका छन् । नेपाली काङ्ग्रेसका विभिन्न तहका नेता, ब्यापारी ,बुद्धिजीवी , समाजसेवी लगाएत सम्पूर्णले मैनबत्ती बालेर संविधान दिवस मनाएका हुन ।
नेपाली काङ्ग्रेस केन्द्रको निर्देशन अनुसार दीप प्रज्वलन कार्यक्रम गरिएको नगर सभापति तिलक रावतले बताए । प्रमुख अतिथि समेत रहनु भएका नेपाली काङ्ग्रेस दाङ सभापति शंकर प्रसाद डांगीले कार्यक्रमलाई सम्बोधन गर्दै सहिदहरुको योगदानले निर्माण भएको संविधानको सबैले पूर्णरुपमा कार्यान्वयन गर्नु पर्ने बताए ।
उनले मौलिक अधिकारका विषय संविधानमा ग्यारेन्टी गरिए पनि व्यवहारमा कार्यान्वयन हुन नसकेको र संविधान पूर्णरुपमा कार्यान्वयन गर्ने दायित्व तीन तहकै सरकार, नागरिक, राष्ट्रसेवक कर्मचारी सबैको भएको बताए । नेपाली काङ्ग्रेस दाङका सभापति शंकर प्रसाद डांगिको प्रमुख अतिथी तथा घोराही नगर सभापति तिलक रावतको अध्यक्षतामा भएको कार्यक्रमको सहजीकरण सचिब पुष्पराज आचार्यले गरेक थिय ।
