रामबहादुर बमजन फरार, आश्रमबाट मुख्य शिष्य पक्राउ

माघ २४, सिन्धुली । तपस्वीको रुपमा चिनिँदै आएका रामबहादुर बम्जनलाई पक्राउ गर्न गएको प्रहरीले उनका निकटतम सहयोगी ज्ञानकुमार भोमजनलाई नियन्त्रणमा लिएको छ । अदालतबाट पक्राउ पूर्जी जारी भएपछि बमजन भने फरार भएका प्रहरीको भनाइ छ ।

जिल्ला प्रहरी कार्यालय सर्लाहीको अनुरोधका आधारमा शुक्रबार बिहान जिल्ला प्रहरी कार्यालय सिन्धुलीको टोलीले सिन्धुलीस्थित बमजनको आश्रममा सर्च अपरेशन चलाएको थियो ।

खोजीका क्रममा बमजन फेला नपरेपछि आश्रममा ‘तोपचेन’ नामले चिनिने ज्ञानकुमार भोमजनलाई ‘बोलाएर ल्याइएको’ सिन्धुली प्रहरी प्रमुख प्रहरी उपरीक्षक (एसपी) रञ्जु सिग्देलले जानकारी दिइन् ।

‘सर्लाही प्रहरीको अनुरोधमा हामीले शुक्रबार बिहानैदेखि आश्रममा सर्च अपरेशन चलाएका थियौं । खोजीका क्रममा बमजन नभेटिएपछि उनका निकट सहयोगीलाई बोलाएका छौं,’ एसपी सिग्देलले भनिन्, ‘अहिले बमजनका सहयोगीसँग सोधपुछ भइरहेको छ ।’

जिल्ला प्रहरी कार्यालय सिन्धुलीको टोलीले शुक्रबार बिहानदेखि कमलामाई नगरपालिका–८ पैरेस्थित बम्जनको आश्रममा खोजी शुरु गरेको थियो । खोजीका क्रममा अनुयायीहरुले ‘असहयोग’ गरेपछि बमजनलाई फेला पर्न नसकिएको आश्रम पुगेका जिल्ला प्रहरी कार्यालय सिन्धुलीका एक अधिकारीले जानकारी दिए ।

बम्जनमाथि व्यक्ति बेपत्ता पारेको, महिला अनुयायीमाथि जबरजस्ती करणी गरेकोलगायत आरोप छन् । जिल्ला प्रहरी कार्यालय सर्लाहीको निवेदनानुसार जिल्ला अदालत सर्लाहीले बिहीबार मात्रै बम्जनलाई पक्राउ गर्न अनुमति प्रदान गरेको थियो ।

प्रहरीले गित डेढ वर्षदेखि बम्जनविरुद्ध अनुसन्धान गरिरहेको छ । गत वर्ष नै बम्जनविरुद्ध आश्रमका केही महिला अनुयायी (आनी)सहितका व्यक्तिलाई बेपत्ता पारेको उजुरी परेको थियो ।

बम्जनविरुद्ध नुवाकोटकी कर्मा तामाङ, सर्लाहीकी रिता बोट, मकवानपुरकी फूलमाया रुम्बा, सुरेश आलेमगर र सञ्चमान वाइवालाई बेपत्ता पारेको आरोप छ । व्यक्ति बेपत्ता तथा हत्या गरेको उजुरीका आधारमा नेपाल प्रहरीको केन्द्रीय अनुन्धान ब्यूरो (सीआईबी)ले समेत बम्जन विरुद्ध अनुसन्धान गरिरहेको छ ।

सीआईबीसहित प्रहरीको टोलीले गत वर्षको पुसमा समेत बम्जनको सिन्धुपाल्चोकको इन्द्रावती गाउँपालिकाको बाडेगाउँस्थित आश्रममा छापा मारेको थियो । सीआईबीको टोलीले त्यतिबेला केही महत्वपूर्ण प्रमाण फेला पारेको बताएको थियो ।