सल्यान ।
जिल्ला प्रशासन कार्यालय सल्यानमा राष्ट्रिय परिचयपत्र बनाउन आएका एकजना पुरुषकाे लडेर मृत्यु भएकाे छ ।

राष्ट्रिय परिचयपत्र बनाउन बिहीबार जिल्ला प्रशासन कार्यालयमा पुगेका बागचौर नगरपालिका वडा नम्बर ७ टाट्के निवासी ७० वर्षीय टीकाराम वलीकाे एक्कासी लडेर मृत्यु भएकाे हाे ।

कार्यालय बाहिरबाट हिँड्दै आएर ढोकामा पुगेपछि उनि ढलेको र उपचारका लागि जिल्ला अस्पतालमा पठाइएकोमा अस्पतालले मृत घोषणा गरेको जिल्ला प्रहरी कार्यालय सल्यानले जनाएकाे छ ।

राष्ट्रिय परिचय पत्र बनाउन जिल्ला प्रशासन पुगेका सेवाग्राही वली बहिरबाट कार्यालयको ढोकामा पुगेर ढलेको सहायक प्रमुख जिल्ला अधिकारी हरिश्चन्द्र शर्माले बताएका छन । उनले भनेः ” हामीले सिसटिभि हेर्यौ, बाहिरबाट ढोकामा पुगेर अडिन खोज्नुभयो चक्कर लाग्यो होला लडेपछि टाउकोमा चोट लागेको थियो, अस्पताल लिएपछि निधनको खबर आयो, यो दुःखद भयो ।”

उनको साथमा भान्जीज्वाइँ पनि थिए। उनी दम, रक्तचापको बिरामी थिए । उनको मृत्युको कारण खुलिसकेको छैन। शवको पोष्टमर्टमपछि मात्रै कारण खुल्ने प्रहरीले जनाएको छ। अहिले मृतकको शव जिल्ला अस्पतालमै राखिएको छ।